yahan mahaul kuchh aisa hua hai
mohabbat lafz tak ruswa hua hai

hukumat raushni ne chhod di ab
tabhi zulmat tera qabza hua hai

hamari jit pakki ho gai thi
hamein shak hai kahin dhoka hua hai

badhi hai yun to mahngai watan mein
lahu apna magar sasta hua hai

tera marham tujhe hi ho mubarak
ki is se zakhm aur gahra hua hai

tumhein malum ho 'hamza' to bolo
nizam-e-shahr kyon bigda hua hai