yaqin hai ki guman hai mujhe nahin malum
ye aag hai ki dhuan hai mujhe nahin malum

ye har taraf hai koi mahfil-e-tarab barpa
ki bazm-e-gham-e-zadagan hai mujhe nahin malum

liye to phirta hun ek mausam-e-wajud ko main
bahaar hai ki khizan hai mujhe nahin malum

wo rang-e-gul to usi khak mein ghula tha kahin
magar mahak wo kahan hai mujhe nahin malum

khabar to hai ki yahin qarya-e-malal bhi hai
ye kaun mahw-e-fughan hai mujhe nahin malum

main tujh se dur usi dasht-e-na-rasi mein hun gum
idhar tu nauha-kunan hai mujhe nahin malum

ye dagh-e-ishq jo mitta bhi hai chamakta bhi hai
ye zakhm hai ki nishan hai mujhe nahin malum

guzarta jata hun ek arsa-e-gurez se main
ye la-makan ki makan hai mujhe nahin malum

rawan-dawan to hai ye ju-e-zindagi har dam
magar kidhar ko rawan hai mujhe nahin malum

ye kashmakash jo man-o-tu ke darmiyan hai so hai
miyan-e-sud-o-ziyan hai mujhe nahin malum

ye ku-e-khak hai ya phir dayar-e-khwab koi
zamin hai ki zaman hai mujhe nahin malum

yahin kahin pe wo khush-ru tha aaj se pahle
magar wo aaj kahan hai mujhe nahin malum