yar ki rahguzar ko bhi dekh
phir gham-e-rozgar ko bhi dekh

go chaman mein hain khun ke chhinte
par zara lala-zar ko bhi dekh

aadmi qabil-e-yaqin nahin
ek dekha hazar ko bhi dekh

falsafa falsafa hi to hai bas
zindagi ke nigar ko bhi dekh

donon ka lutf khatm kar loge
gul ko bhi dekh khar ko bhi dekh

zakhm ko main ne kar liya nasur
dekh is shah-kar ko bhi dekh

muft badnam hai meri wahshat
'mir'-ji ke shiar ko bhi dekh

zard gul aur lal patte hain
'arsh' aisi bahaar ko bhi dekh