ye fazilat mere me'yar se kam hai shayad
aankh se khun na tapka abhi nam hai shayad

wo mera ho nahin paya so ghula jata hun
ek 'arse se mere dil mein ye gham hai shayad

wo jise marne wala hai zamana sara
us ke hathon mein sadaqat ka 'alam hai shayad

kaun samjhae ye 'uqda ki ai basti walo
zulm khamoshi se sah lena sitam hai shayad

aise ma’ruf bade logon mein ghazlen kahna
khaliq-e-nutq-o-qalam ka ye karam hai shayad