ye jahan-naward ki dastan ye fasana dolte sae ka
mere sar-burida khayal hain ki dhuan hai suni sarae ka

wo hawa ka chupke se jhankna kisi bhule bisre madar se
kahin ghar mein shahr ki zulmaten kahin chhat pe chand kirae ka

gil-e-mah ghumte chaak par kaf-e-kuza-gar se phisal gai
ki bisat-e-gardish-e-sal-o-sin yahi farq apne parae ka

mera nutq bhi hai nigah bhi meri shairi ka gawah bhi
teri dosti ke mahaz par wo larazta aks kinae ka

ki usi ke nam tak aae the ye sada-o-sidq ke silsile
wahi shakhs jis ne tere liye kiya qatl sochti rae ka