ye kaisa shahr ka manzar dikhai deta hai
har ek samt samundar dikhai deta hai

sulagti dhup mein aksar dikhai deta hai
mujhe wo shakhs to patthar dikhai deta hai

samajh raha tha jise apna gham-gusar bahut
usi ke hath mein khanjar dikhai deta hai

khuda hi jaane ki rahta hai us mein aakhir kaun
muhib dasht mein ek ghar dikhai deta hai

usi ke niche rukega thaka hua har shakhs
ye ped aisa tanawar dikhai deta hai

ugegi fasl mohabbat ki kis tarah rahman
dilon ka khet hi banjar dikhai deta hai