ye kya kaha ki jamal un ka be-hijab na tha
ye mahtab nahin tha ye aaftab na tha

na hai wo daur jo majruh-e-inqalab na tha
tumhaare husn mere ishq ka jawab na tha

jahan-e-gham mein tasawwur bhi kaamyab na tha
'shifa' hamari qayamat mein aaftab na tha

ye tha hijab-e-fareb us ka ya fareb-e-hijab
ki be-hijab tha wo aur be-hijab na tha

wo barhami se sahi mujh ko dekh to lete
kharab tha magar itna to main kharab na tha

khata muaf ho wo din bhi yaad hain ki nahin
hamein hijab tha aur aap ko hijab na tha

dil-e-shafaq se lab-e-gul se chashm-e-shabnam se
kahan kahan se farozan tera shabab na tha

'shifa' wo rota na kyunkar gulon ke hansne par
jo gham-nasib ki gham mein bhi kaamyab na tha