ye waqia to lage hai suna hua sa kuchh
har ek shakhs kahe hai kaha hua sa kuchh

wo gahre gahre sabhi zakhm bhar gae jab se
naya sa dard lage hai saha hua sa kuchh

ye tez o tund hawaen uda hi le jaen
agar bacha ke na rakkhun bacha hua sa kuchh

karahne ki sadaen bhi ab nahin aatin
tamam shahr lage hai dara hua sa kuchh

har ek lash mein kuchh khwab sans lete hue
har ek wajud mein jaise mara hua sa kuchh

ye khauf hai kahin aatish-fishan na ban jae
hamare panw ke niche daba hua sa kuchh