yun hi hai nur wahdat ka dil-e-insan mein aa jaana
ki jaise aankh ke til mein jahan-bhar ka sama jaana

na lete nam bhi wo zulm ka bhule se duniya mein
agar itna samajh lete ki hai pesh-e-khuda jaana

ye fitrat husn ki hai aur wo tinat mohabbat ki
jise tum ne jafa samjha use hum ne wafa jaana

bayan kar dena haal-e-zar hum sahra-nashinon ka
agar kuche mein is zalim ke o baad-e-saba jaana

mile fursat agar tum ko to baad marg dam-bhar ko
bara-e-fatiha bekas ki turbat par bhi aa jaana

na samjhi tum ne kuchh hasti hamari ishq mein lekin
tumhein apne se bhi hum ne siwa samjha siwa jaana

haqiqat mein wahi manzil-shanas-e-rah-e-irfan hai
ki jis ne apni har ek sans ko bang-e-dara jaana

samajhta koi jite-ji to han ek baat thi 'shoala'
mere marne pe duniya ne mujhe jaana to kya jaana