yun teri rahguzar se diwana-war guzre
kandhe pe apne rakh ke apna mazar guzre

baithe hain raste mein dil ka khandar saja kar
shayad isi taraf se ek din bahaar guzre

dar-o-rasan se dil tak sab raste adhure
jo ek bar guzre wo bar-bar guzre

bahti hui ye nadiya ghulte hue kinare
koi to par utre koi to par guzre

masjid ke zer-e-saya baithe to thak-thaka kar
bola har ek minara tujh se hazar guzre

qurban is nazar pe mariyam ki sadgi bhi
sae se jis nazar ke sau kirdgar guzre

tu ne bhi hum ko dekha hum ne bhi tujh ko dekha
tu dil hi haar guzra hum jaan haar guzre