zabt mumkin na rahe baat hi aisi hogi
hauslon ne to bahut parda-dari ki hogi

sar uthate hue jhuk jati hain nazren jis ki
us ki ghurbat bhi koi zat to rakhti hogi

jo kisi nam se mansub thi ab tak shayad
khana-e-dil mein wo masnad abhi khali hogi

saya-e-gul se lipat kar koi roya hoga
chandni jab dar-o-diwar pe utri hogi

phir zamistan ki thithurti hui shab ne chup-chap
us ki palkon pe meri yaad piro di hogi

koi tarik darichon ke pare sochta hai
raushni apni riwayat to rakhti hogi

har kisi ke liye hote hain juda paimane
kasa-e-chashm se daryuza-gari ki hogi