zamana apni hi surat pe marne lag jae
to kya ab aaina khud se mukarne lag jae

kisi sada mein wo aahang-e-inqalab to ho
ki khar-zaron ki duniya sanwarne lag jae

hamein ye dhyan to rakhna tha baad-o-baran se qabl
ki sail-e-ab na sar se guzarne lag jae

sitara ab koi diwar-e-shab mein dar to kare
ujala dasht-e-siyah mein utarne lag jae

karoge kya jo na kashti-e-jaan duboi gai
tum ehtimam karo ye ubharne lag jae

chalo na hum koi surat mufid si sochen
fizai bagh zara aur nikharne lag jae