zamana dhund raha tha kidhar gaya pani
kisi ka hukm hua to thahar gaya pani

wo dhup thi ki zamin jal ke rakh ho jati
baras ke ab ke bada kaam kar gaya pani

bada ghurur tha apni chamak-damak pe use
sunar ne jo tapaya utar gaya pani

khuda ka khauf nahin ab tumhaare zehnon mein
tawahhumat ka is tarah bhar gaya pani

shikast-khurda ye qaumen tumhein mita dengi
agar tumhaari hamiyyat ka mar gaya pani

taras na aaya gharibon ke haal par 'ajiz'
sisakte paudon ke sar se guzar gaya pani