zer-e-zamin utar gae ya sar-e-asman gae
pesh-rawan-e-rah-e-zist kaun kahe kahan gae

koi raha na aas pas ai dil-e-dost-na-shanas
chhod ke tujh ko mahw-e-yas sab tere mehrban gae

arsa-e-arzu mein thin yun to hazar wusaten
tere qarib hi rahe ahl-e-wafa jahan gae

hosh ke marhalon mein ek marhala-e-junun bhi tha
wadi-e-wahm se sabhi fikr ke karwan gae

jab bhi hawa-e-dasht ne ahl-e-junun ko di sada
mauj-e-shamim-e-gul ke sath hum bhi kashan kashan gae

kaise wo log the jinhen be-khabari qubul thi
hum to junun-e-agahi le ke gae jahan gae

ahd-e-junun ke mashghale waqt ne sab badal diye
shauq ki laghzishen gain zabt ke imtihan gae

aakhir-e-kar khamushi hi se khule dilon ke raaz
harf-e-sukhan zaban pe jo aae the raegan gae

hosh ki juraten tamam hadd-e-yaqin pe ruk gain
khalwat-e-naz tak teri sirf mere guman gae

zehn ki chob-e-khushk ko phunk gai sukhan ki aanch
dud-e-nawa ke daere jaane kahan kahan gae