zindagi ek wabaal hai sahab
ab to jina muhaal hai sahab

aap jo kuchh kahen wahi sach hai
be-sabab qil-o-qal hai sahab

aap ki be-rukhi hamare liye
zindagi ka sawal hai sahab

gham-e-duniya ho ya gham-e-uqba
neamat-e-la-zawal hai sahab

us ne puchha hai aaj mera mizaj
ab tabiat bahaal hai sahab

hum mohabbat ki baat karte hain
aap ka kya khayal hai sahab

zakhm ab kaise hum dikhaen 'habab'
ek tedha sawal hai sahab