zindagi ki yahi kahani hai
sans aani hai aur jaani hai

tum jo hote to baat kuchh hoti
ab ki barish to sarf pani hai

ek taraf us ki bolti aankhen
ek taraf meri be-zabani hai

yun hi sunte rahen agar dil ki
yaad rakhiye ki jaan jaani hai

dhup lagti hai baadalo jaisi
ye mohabbat ki saebani hai

bahti jati hun ek samundar mein
us ki yaado ki baadbani hai

har taraf khar khar hai gulshan
baghban khub baghbani hai

aashna hun main ab sarabon se
main ne sahra ki khak chhani hai

'chandni' ki ghazal-wazal sahab
us ke khwabon ki tarjumani hai