zindagi ko ek rangin dastan samjha tha main
zindagi bar-e-garan hai ye kahan samjha tha main

han wahi aansu tapak kar kitna ruswa kar gae
jin ko apna raazdar-e-be-zaban samjha tha main

un ka daman tham kar kitne darakhshan ho gae
mere wo aansu ki jin ko raegan samjha tha main

allah allah un ke pae naz ka husn-e-khiram
rahguzar thi un ki jis ko kahkashan samjha tha main

tah-ba-tah zulm-o-sitam ki ek rida-e-nil-gun
khinch di sar par jise haft aasman samjha tha main

ajib shakhs tha mansur sochta hun main
ki de ke sar bhi pukara kiya khuda hun main

na sair-gah na meri qayam-gah yahan
bhatak ke hadd-e-tayyun mein aa gaya hun main

khirad ki sari haden par ho gain phir bhi
kisi pe ye na khula aaj tak ki kya hun main

suna hai jab se har ek shai mein tera jalwa hai
bade ghurur se aaina dekhta hun main