zindagi pai hai ek chashm-e-sitam-gar ki tarah
hum pareshan hain gharibon ke muqaddar ki tarah

apna tan karb-o-bala ban ke jala hai barson
hum bhi pyase hain bahut aal-e-payambar ki tarah

ab koi ram nahin gham ka dhanush jo tode
zindagi roti hai sita ke swayamwar ki tarah

hum ne chaha tha ki hum apni tarah se ji len
hum pe ilzam barasne lage patthar ki tarah

roz ji uthte hain suraj ki kiran ke hamrah
aur mar jate hain har sham samundar ki tarah

jate raston mein kahan us ko ganwa aae 'hasan'
ek naqsha sa nigahon mein jo tha ghar ki tarah