mahw-e-hairat hun ki wo setter tha kitna ba-kamal
ishq ke bare mein puchha jis ne parche mein sawal

aise hi setter agar do chaar paida ho gae
dekhna is mulk mein fankar paida ho gae

aam hogi aashiqi collage ke arz-o-tul mein
laila o majnun nazar aaenge ab school mein

ishq ke aadab ladkon ko sikhae jaenge
ghair-ashiq jo hain wo aashiq banae jaenge

aashiqon ko ilm mein perfect samjha jaega
ishq ek compulsory subject samjha jaega

imtihan hoga to puchhe jaenge aise sawal
apni mahbuba ke bare mein kuchh izhaar-e-khayal

ishq ek science hai ya art samjha kar likho
ya ye donon ishq ka hain part samjha kar likho

aaj apne mulk mein aashiq hain kitne fisadi
muntahi in mein hain kitne aur kitne mubtadi

kya talluq tibb-e-yunani ko hai ruman se
compare farhad o majnun ko karo luqman se

ishq kitne qism ka hota hai likho ba-wasuq
fi zamana kya hain aashiq ke faraez aur huquq

ek tahqiqi maqala likh ke samjhao ye baat
shakh-e-ahu par hi kyun rahti hai aashiq ki baraat

kuchh misalen de ke samjhao ye qaul-e-mustanad
ishq awwal dar-dil-e-mashuq paida mi shuad

sar ko kya nisbat hai sang-e-astan-e-yar se
tum ne sar phoda kabhi mashuq ki diwar se

kya sakun milta hai dil ko aah-e-shoala-bar se
garm nale arsh par jate hain kis raftar se

apne andaze se tul-e-sham-e-tanhai batao
sirf takhminan shab-e-hijran ki lambai batao

india ka ek naqsha apni copy par banao
aur phir us mein hudud-e-kucha-e-jaanan dikhao

wasl ki darkhwast par kis ki sifarish chahiye
ishq ke paude ko kitne inch barish chahiye

apni mahbuba ko ek darkhwast english mein likho
us se ye puchho jawab-e-arzu yes hai ki no

kaun se aale se dekhen husn-e-jaanana likho
husn ki miqdar jo nape wo paimana likho

mother-e-laila ne to laila na byahi qais ko
tum agar laila ki man hote to kya karte likho

ek aashiq tin din mein chalta hai unnis mil
tin aashiq kitne din mein jaenge adtis mil

aap kar sakte hain in mein se koi barah sawal
bad-khati ke panch number hain rahe ye bhi khayal