jab nur ke parde se hata parda-e-zulmat
jab subh ke mathe se miti gard-e-khurafat

pau phutne wali thi to mashriq tha hinai
milne ko thi duniya ko shuaon ki badhai

sahmi hui utri to thi aakash se shabnam
ghunchon ko tabassum ka wo paigham thi taham

kaliyon ko jo badmast hawa chum rahi thi
is chhed par har shakh-e-chaman jhum rahi thi

chidiyon ki chahak dur se deti thi sunai
udne ki jasarat abhi un mein na thi aai

sabza kahin chup-chap guhar rol raha tha
gul hans ke kahin band-e-qaba khol raha tha

fitrat ke pujari bhi bahut jag chuke the
sairon ke liye log bhi kuchh bhag chuke the

taqdis ke paband bhi ganga ke kinare
jate the kahin tez kahin sust bechaare

puja koi karta tha tilak koi banata
jal hath mein leta koi mathe pe lagata

itne mein numayan hua ek paikar-e-nuri
qadmon mein shafaq jis ke padi bahr-e-huzuri

sanche mein dhale jaise ki andam the sare
lapke wo qadam chumne bahte hue dhaare

bojhal thi palak nind ke be-sakhta-pan se
chhutti thi kiran jaise ki har mu-e-badan se

thaali jo uthae thi to dil walon ko mahmez
mahjub hua dekh ke khurshid-e-sahar-khez

sari ki sanbhaale hue chutki se thi chunan
badhti thi use dekh ke har qalb ki dhadkan

dariya mein dhare panw bade naz-o-ada se
pariyan si lapakne lagin pani ki rida se

ruk ruk ke jo do-chaar qadam aur badhae
chunan ko sanbhaale hue thaali ko uthae

nazrana diya phul ka amwaj ko us ne
thaali ko liya khadima-e-khas ne badh ke

phir aab-e-muqaddas mein jo dubki si lagai
badli si zara der ko mahtab pe chhai

pani se pari par ko jhatakti hui nikli
andam-e-gul-andam se lipti hui sari

moti se baraste the har ek mu-e-siyah se
shabnam ke wo qatre the kanwal par jo pade the

wo mast-e-khiram aai usi taur gai bhi
par barq-e-tapan khirman-e-hasti par giri bhi