mans ki faslen
jawan ho kar

pareshan ho gai hain
hawa ki saltanat mein

hilte rahne ke alawa
aur kuchh chaara nahin hai

kar ke takhliq bata do logo
mans ke ped laga do logo

chhin lo sari chamak hathon se
aur phir in mein asa do logo

jab bhi tufan koi uthna chahe
ret mein us ko daba do logo

tang tah-khanon se bahar niklo
kaenaton ko sada do logo

warna tum ko ye dabochega abhi
khauf ko chikh bana do logo

khushk pedon ki kathaen sun lo
un mein phir aag laga do logo