hum sulh-o-murawwat ka jab hath badha denge
ek umr ke ruthon ko aapas mein mila denge

mulla-o-barahman ab mayus na hon hargiz
hum masjid-o-mandir ke jhagdon ko chuka denge

kyon dukh ho gharibon ko hum kis liye hain aakhir
jo un ko sataenge hum un ko mitaenge

aapas ki adawat se har dubti kashti ko
ehsan o murawwat se hum par laga denge

phir ghair na samjhenge ek dusre ko insan
jab un ko mohabbat ka aaina dikha denge

mazhab ho koi lekin hai hind watan apna
hum 'zeb' watan ki har bigdi ko bana denge