khyalat-o-ehsas
jo be-sakhta likh diye hain

na jaane wo kab se dil-o-jaan ke andar chhupe the
kisi raaz jaise

qalam-band hone ko bechain the
kai dard uljhe sawalat

jo safhe pe sajne ko betab the
wo sab

qalam se mere motiyon ki tarah
ab barasne lage hain

sabhi raqs karne lage hain
meri chashm-e-pur-nam

jo sailab roke hue hai
sitare chamakte hain meri palak par

unhen main raqam kar rahi hun
jo tufan hai maujzan mere andar

wo arman wo khwab
kai la-shuuri mazamin ban kar

waraq-dar-waraq jagmagane lage hain
sabhi raqs karne lage hain

aur ab
usi jazb-o-ehsas ke zer-e-saya

ghazal phul ban kar mahakti hai
kabhi nazm gati hai wo git

ki jo be-khayali mein takhliq ho kar
banati hai rangin paikar

ye bazm-e-sukhan ko sajaane pe mail
khayalat sab raqs karne lage hain

qalam se mere motiyon ki tarah
ab barasne lage hain

sabhi raqs karne lage hain