wo chalata hai daftar-e-shadi
dost aisa bhi ek hamara hai

fees leta hai dil milane ki
aur isi kaam par guzara hai

koi shadi baghair mar jae
ye bhala kab use gawara hai

aqd-e-sani ki jin ko khwahish ho
un ki ummid ka sitara hai

jin ko rishta kahin na milta ho
un ka ye aakhiri sahaara hai

sochta hun ki hai wo khush-qismat
ya haqiqat mein gham ka mara hai

an-ginat shadiyan kara dalin
aur khud aaj tak kanwara hai