![](http://cdn.pagalshayari.com/images/nazm/dar-ul-makafat-nazeer-akbarabadi-nazm-english.jpg)
hai duniya jis ka nanw miyan ye aur tarah ki basti hai jo manhgon ko ye mahngi hai aur saston ko ye sasti hai yan har-dam jhagde uthte hain har-an adalat basti hai gar mast kare to masti hai aur past kare to pasti hai kuchh der nahin andher nahin insaf aur adl-parasti hai is hath karo us hath mile yan sauda dast-ba-dasti hai jo aur kisi ka man rakhe to us ko bhi arman mile jo pan khila de pan mile jo roti de to nan mile nuqsan kare nuqsan mile ehsan kare ehsan mile jo jaisa jis ke sath kare phir waisa us ko aan mile kuchh der nahin andher nahin insaf aur adl-parasti hai is hath karo us hath mile yan sauda dast-ba-dasti hai jo aur kisi ki jaan bakhshe to us ki bhi haq jaan rakhe jo aur kisi ki aan rakhe to us ki bhi haq aan rakhe jo yan ka rahne wala hai ye dil mein apne jaan rakhe ye turat-phirat ka naqsha hai is naqshe ko pahchan rakhe kuchh der nahin andher nahin insaf aur adl parasti hai is hath karo us hath mile yan sauda dast-ba-dasti hai jo par utare auron ko us ki bhi par utarni hai jo gharq kare phir us ko bhi dubkon dubkon karni hai shamshir tabar banduq sinan aur nashtar tir nahrni hai yan jaisi jaisi karni hai phir waisi waisi bharni hai kuchh der nahin andher nahin insaf aur adl-parasti hai is hath karo is hath mile yan sauda dast-ba-dasti hai jo upar uncha bol kare to us ka bol bhi baala hai aur de patke to us ko bhi koi aur patakne wala hai be-zulm-o-khata jis zalim ne mazlum zabah kar dala hai us zalim ke bhi lohu ka phir bahta naddi-nala hai kuchh der nahin andher nahin insaf aur adl-parasti hai is hath karo us hath mile yan sauda dast-ba-dasti hai jo misri aur ke munh mein de phir wo bhi shakkar khata hai jo aur tain ab takkar de phir wo bhi takkar khata hai jo aur ko dale chakkar mein phir wo bhi chakkar khata hai jo aur ko thokar mar chale phir wo bhi thokar khata hai kuchh der nahin andher nahin insaf aur adl-parasti hai is hath karo us hath mile yan sauda dast-ba-dasti hai jo aur kisi ko nahaq mein koi jhuti baat lagata hai aur koi gharib aur bechaara haq na-haq mein lut jata hai wo aap bhi luta jata hai aur lathi-pathi khata hai jo jaisa jaisa karta hai phir waisa waisa pata hai kuchh der nahin andher nahin insaf aur adl-parasti hai is hath karo us hath mile yan sauda dast-ba-dasti hai jo aur ki pagdi le bhage us ka bhi or uchakka hai jo aur pe chauki bithlawe us par bhi dhons-dhadakka hai yan pushti mein to pushti hai aur dhakke mein yan dhakka hai kya zor maze ka jamghat hai kya zor ye bhid-bhadakka hai kuchh der nahin andher nahin insaf aur adl-parasti hai is hath karo us hath mile yan sauda dast-ba-dasti hai hai khatka us ke hath laga jo aur kisi ko de khatka aur ghaib se jhatka khata hai jo aur kisi ke de jhatka chire ke bich mein chira hai aur patke bich jo hai patka kya kahiye aur 'nazir' aage hai zor tamasha jhat-patka kuchh der nahin andher nahin insaf aur adl-parasti hai is hath karo us hath mile yan sauda dast-ba-dasti hai
This is a great urdu shayari andhera. True lovers of dosti shayari in punjabi will love this. For some people shayari is the most enjoyable thing in life and they absolutely adore new shayari 2017. Please share if you liked this!!!