par karna hai mujh ko dasht-e-umr
meri manzil-e-adam hai us ke par

aage kitna tawil rasta hai
aur kitna kathin nahin malum

shauq-e-manzil mujhe na zauq-e-safar
ham-safar hai na hai koi rahbar

aur har gam par sarab koi
hai meri tishnagi badhane ko

chal raha hun mein be-dili ke sath
ye safar mujh pe hai garan lekin

main use tark kar nahin sakta
main to pal-bhar thahar nahin sakta

ye muqaddar hai ya ki majburi
chalte rahna hai mujh ko har surat