ye aankhen bilkul waisi hain
jaisi mere khwab mein aati thin

peshani thodi hat kar hai
par honton par muskan ki banti mitti lahren waisi hain

aawaz ka zer-o-bam bhi bilkul waisa hai
aur hath jinhen mein khwab mein bhi

chhuna chahun to kanp uthun
ye hath bhi bilkul waise hain

ye chehra bilkul waisa hai
par is par chhai khamoshi kuchh an-dekhi

aur us chehre par sham zara si gahri hai
in shanon ka phailao thoda kam hai

lekin qamat bilkul waisi hai
aur tum se mil kar mere dil ki haalat bilkul waisi hai