wo ek lamha ki
lam-yazal ne azal ki khush-bakht saaton ka khamir le kar

hamare khun ki rutubaton mein bhigo ke
ek munhani se paikar mein dhaal kar

dhire dhire
aazmaish ke marhalon se guzar kar

jis ko dam kiya tha
wo ek lamha ki tarah jis ki

samundaron ki riwayaton se
hawaon ki sansanahaton ki hikayaton se

khaliq mitti ki sondhi sondhi amanaton se
jhulaste suraj ki barguzida tamazaton se

amal mein aai wo ek lamha ki
sab awamil asir kar ke

zaman ki yak-rang sarhadon ko phalang kar jab
makan ki pechida wusaton par raqam hua tha

amin hai sachchi ibaadaton ka
hamare mathe pe jo likhe hain

halif hai sari azmaton ka sadaqaton ka
hamare khun mein jo rach gai hain

harif hai sab kuduraton ka, adawaton ka, saubaton ka
hamari banjar zamin ke sine se jo ugi hain

azim markaz hai na-shunida inayaton ka, mohabbaton ka, rifaqaton ka, murawwaton ka
hamari ruhon mein jo basi hain

hum apne khaliq ki kaun si nematon se inkar kar sakenge
ki sajda-gah-e-yaqin se

phuti hui kiran mein asir hain hum
bulandiyon ke safir hain hum

guzishta sadiyon ke mojazon ki nazir hain hum
azim danish ko hum ne

harf o nawa ki rangin rida ata ki
zaruraton ki qaba ata ki

wo ek lamha ki
aarzu mein azal se jis ki

haqiqaton ki
jhulasti dahliz pe

hum ne tum ne
mubasharat ke tamam aasan hi aazmae

agar hamare dilon mein diwar-e-jaan uthae
magar ye mumkin hi kis tarah hai ki

hum mohabbat ke bij bo kar adawaton ke shajar ugaen
jo ek lamha hum

apne khaliq ke nam mansub kar chuke hain
wo ek lamha agar na aae

magar ye imkan ki sarhadon se gurez hoga
gurez jo aasman se utre

kisi sahife ki wa-jbin par
raqam nahin hai

hum apne khaliq ki kaun si nematon se inkar kar sakenge