salgirah khargosh manae
jangal ke sab sathi aae

bhid lagi hai mehmanon ki
kuchh apnon kuchh beganon ki

sher dahaden marta aae
hathi bhi chinghadta aae

kutta bhaun bhaun karta aaya
sanbhar chaukdi bharta aaya

gay jab rambhati aai
bakri kuchh sharmati aai

nachta gata aaya bhaalu
dolta aaya meindha kalu

ghoda sarpat dauda aaya
bhainson ka ek joda aaya

hirni aai lomdi aai
billi apne bachche lai

sath mein sab hi lae tohfe
sab khargosh ne pae tohfe

phulon ka guldasta le kar
chin chin karta aaya bandar

cake bana ke laya chita
us ne dil khargosh ka jita

cake kata to sare khush the
cake bata to sare khush the

ek duje se gale mile sab
bhul ke shikwe aur gile sab

bandar nache bhaalu gae
kalu meindha dhol bajae

salgirah ka jashn bapa hai
jangal jangal shor hua hai