rangon mein wo baat nahin hai aur hunar bhi aajiz hai
kaun banaega taswiren jab aankhon mein khwab nahin

ashkon mein wo zor nahin hai dil mein waisi tab nahin
kab se rasta dekh rahe hain dekhne wale hasrat se

ek musawwir aaega jo dard ke rang jagaega
in khwabida rangon mein wo dil ka nur milaega

phir taswiren bolengi aur dad hunar ki paengi
ya phir aib ki tohmat le kar be-qimat bik jaengi