tanha hasin hayat ke saghar ko kya karun
sathi nahin to baada-e-kausar ko kya karun

har husn par guman hai tujhe naqsh-e-yar ka
ai ishq tere wahm-e-sarasar ko kya karun

raushan the jis ke nur se baam aur aastan
wo jalwa-gar nahin hai to us ghar ko kya karun

jis mein wo dilkashi hai na wo shan-e-dilbari
aise hasin se bhi hasin-tar ko kya karun

jis ki jhalak pe lakh sitaron ko rashk tha
wo lau nahin to mehr-e-munawwar ko kya karun

ai zarf-e-did tu hi bata bazm-e-tur se
jalwa jo uth gaya hai to manzar ko kya karun

us ki taraf se to na thi kotahi-e-karam
'hindi' main khud hi apne muqaddar ko kya karun