mere pyare khudawanda
mujhe jab kun ki saat mein

tere be-aib yakta dast-e-qudrat ne
tere aadam ki baqi bach rahi mitti se gundha tha

mera naqsha banaya tha
to mujh mein kya tere aadam se kamtar ruh phunki thi

ki jaise be-dili ujlat mein koi kaam nimtaya
meri takhliq kya khaliq

teri chashm-e-tasawwur ki
kisi mansuba-sazi ki nahin marhun-e-minnat bhi

mujhe paida kiya tu ne kisi duje ki khatir kya
teri hikmat ke sare kar-khanon mein

nahin kuchh tazkira mera
mujhi par tohmat-e-awwal hai aadam ke bhatakne ki

usi din se ye aadam jab kabhi bhatka hai ai maula
tamam ilzam meri zat se mansub rahta hai

zamin pe main tere naeb ki naeb hun
usi ki har zarurat ka main saman hun

mujhe ab zindagi-bhar ek saya ban ke jina hai
kisi aadam ki khwahish aur marzi mein dhala

ek aks ban kar zinda rahna hai
mere takhliq hone ki yahi kya maqsadiyyat hai

mere pyare khudawanda mujhe kyunkar na-jaane
apne be-waqat fasane ke hawalon mein

kahin par jhol lagta hai ye qissa kuchh ajab sa hai
ki arz-o-arsh ka malik jo hai insaf ka khaliq

wo itni be-rukhi be-e'tinai kaise bartega
wo khud kaamil hai phir naqis ye paikar kyun tarashega

kisi ki dil-lagi mein kyun mujhe duniya mein laega
mujhe aisa bhi lagta hai

ki ye gutthi bahut par pech farsuda khayalon ki
kabhi to hal bhi honi hai

aur is andher nagri mein
azal se kamtari ka bojh dhoti bint-e-hawwa ki

darakhshan kal bhi honi hai