wo ek diwana sa ladka
kisi se pyar kar baitha

nahin socha kabhi us ne
kisi ki wo amanat hai

kisi ke ghar ki izzat hai
samajhta kyun nahin hai wo

nahin mumkin ye chahat hai
ye rasmon se baghawat hai

wo apna dil dukhata hai
use pahron manata hai

parastish us ki karta hai
usi ko pyar karta hai

usi ko sochta hai kyun
usi ko chahta hai kyun

wo ye karta hai nadani
kisi ki us ne kab mani

wo jis ka pak daman hai
pareshan hai wo hairan hai

wo bebas kah nahin pati
tera dukh sah nahin pati

kisi ki rah mein kante
kabhi wo bo nahin sakti

bas itna tum samajh lena
wo teri ho nahin sakti