zaban hili ki gira sar pe jhulta khanjar
muaf ho na sakegi khata-e-shokh-labi

salamti hai isi mein ki be-adab na bano
bade jatan se ye mahfil sajai jati hai

ek ek bhed ki qimat chukai jati hai
ridaen sarkengi pighlega chilmanon ka jalal

na-jaane samne aaengi kitni taswiren
sulagti hairaten chatkhengi aainon ki tarah

jo dekhna use palkon mein dafn kar dena
badhe hudud-e-nazar se na karwan-e-khayal

hai jurm-e-ba-khabari ek azab se bhi siwa
ye jaan bhi na sakoge kidhar se tir aaya

bisat-e-shakh pe un ko qarar kya aae
bahaar aur hai un ki numu hai aur un ka

ye jism khulte hain zarkar bazuon ke liye
chatak ki gunj hai ruswa-e-saut-o-rang magar

zaban hili ki gira sar pe jhulta khanjar