main ye soch kar us ke dar se utha tha
ki wo rok legi mana legi mujh ko

hawaon mein lahraata aata tha daman
ki daman pakad kar bitha legi mujh ko

qadam aise andaz se uth rahe the
ki aawaz de kar bula legi mujh ko

magar us ne roka na mujh ko manaya
na daman hi pakda na mujh ko bithaya

na aawaz hi di na mujh ko bulaya
main aahista aahista badhta hi aaya

yahan tak ki us se juda ho gaya main