tumhein
chikhne-chillane ka koi haq nahin

tum agar haalat ko tabdil kar sakte ho
to maidan-e-amal mein aa kar

apna kirdar ada karo
warna khamosh raho

tum chaho to
barish ki tarah baraste hue kodon par

ginti sikh sakte ho
sikhne ka amal

hamesha jari rahna chahiye
is sikhne ke amal mein

main tumhaara sath de sakta hun
tum jahan ginti bhul jao

mujh se rujua kar lena
main tumhein sabr ki talqin karunga