tarikh ke padhne walon ko
malum hai ye

koi bhi sitam kaisa hi kada
do-chaar ghadi kuchh ghante hi

kuchh roz mahina chand baras
chalti hui tahrikon ka amal

roke bhi agar
to be-mani

tahriken qatl nahin hotin
tahrik chalane walon ke jismon ka lahu

wo indhan hai
jo lamha lamha jal jal ke

har past-o-shikasta hausle ko
ek aag faraham karta hai

tahriken zinda rakhta hai
tahriken qatl nahin hotin