hui muddat ki tujh se baat karne ko tarasta hun
main hun ashkon ka baadal teri furqat mein barasta hun

tere dil ki ghalat-fahmi mere aansu na dho pae
bane hain aaj jo wirsa hain teri yaad ke sae

mujhe itna bata de jaan-e-man mujh se khafa kyon hai
bhula kar qaul apne aaj tu mujh se juda kyon hai

jo tu mujh se chhupati hai na jaane raaz kaisa hai
nazar phulon pe rakh kar pyar kanton se ye kaisa hai

zaban par zikr mera hai karam us par dikhati ho
ye khat kis ka hai chupke se jo aanchal mein chhupati ho

teri ye be-rukhi hamdam mujhe betab karti hai
mujhe bechain aksar surat-e-simab karti hai

kisi manzil pe kya ab raste phir mil nahin sakte
mohabbat ke fasurda phul kya phir khil nahin sakte

mujhe diwana kar degi tamanna tujh se milne ki
ijazat de mohabbat ki kali ko phir se khilne ki

mujhe phir se koi khat phir koi paigham likh bhejo
nahin kuchh aur to kaghaz pe apna nam likh bhejo