masjid mein aur mandir mein
girja-ghar ki khamoshi se

hamd-o-sana ke giton tak
gurudware ki baithak mein

dholak ki har thap se le kar
lat sahab ke pat talak

maulwiyon ke waz se le kar
pandit ke bhajan ke andar

sahraon mein
dariyaon mein

is kone se us kone tak
kaenat ke har goshe mein

farsh se le kar
arsh ke manzar-name tak

diwar-e-girya se le kar
chashm-e-talab ke par talak

aur khala se bhi us par
jis ke liye main sargardan thi

jis ko dhunda gali gali
chaman chaman aur kali kali

wo to meri shah-e-rag mein tha
mera khuda bas mera khuda