meri mashq-e-sukhan ka jab hua un par asar zyaada
meherbani hai un ki mujh pe kam aur hai qahr zyaada

wo waise bhi raha karti hain apni man ke ghar zyaada
wahan rah kar bhi wo rahti hain mujh se ba-khabar zyaada

wo chahe khel chausar ka ho ya shatranj ki bazi
hamesha chaal wo chalti hain apni ek ghar zyaada

wo koshish to bahut karta hai lekin ud nahin sakta
parinde ke nikal aae hain shayad baal-o-par zyaada

maraz shauq-e-masihai ka phaila hai waba ban kar
marizon se kahin ab ho gae hain chaaragar zyaada

khuda mahfuz hi rakkhe hamein in khud-paraston se
jo khud ko jaante kam hain samajhte hain magar zyaada

ghalat-fahmi hai un ki 'khwah-makhwah' ya meri khush-fahmi
samajhte hain mujhe sab shairon mein mo'atabar zyaada