baaten karne mein phul jhadte hain
barq girti hai muskurane mein
nazren! jaise farakh-dil saqi
khum lundhae sharab-khane mein

abhi se lutf-o-murawwat ka ehtimam na kar
nazar ko tir labon ko abhi se jam na kar
abhi na shane se dhalka tu reshmi aanchal
hasin sham hai aise mein qatl-e-am na kar

kare hai adawat bhi wo is ada se
lage hai ki jaise mohabbat kare hai

andaz apna dekhte hain aaine mein wo
aur ye bhi dekhte hain koi dekhta na ho
looking in the mirror she sees her savoir-faire
and also looks to see no one is peeping there

aankhon se haya tapke hai andaz to dekho
hai bul-hawason par bhi sitam naz to dekho
us but ke liye main hawas-e-hur se guzra
is ishq-e-khush-anjam ka aaghaz to dekho
chashmak meri wahshat pe hai kya hazrat-e-naseh
tarz-e-nigah-e-chashm-e-fusun-saz to dekho
arbab-e-hawas haar ke bhi jaan pe khele
kam-talai-e-ashiq-e-jaan-baz to dekho
majlis mein mere zikr ke aate hi uthe wo
badnami-e-ushshaq ka eazaz to dekho
mahfil mein tum aghyar ko duz-dida nazar se
manzur hai pinhan na rahe raaz to dekho
us ghairat-e-nahid ki har tan hai dipak
shoala sa lapak jae hai aawaz to dekho
den paki-e-daman ki gawahi mere aansu
us yusuf-e-bedard ka eajaz to dekho
jannat mein bhi 'momin' na mila hae buton se
jaur-e-ajal-e-tafraqa-pardaz to dekho