dilon pe zakhm laga ke hazar guzri bahaar
gai hai chhod ke ek yaadgar guzri bahaar

mere qarib jo koi gul-e-badan mahka
to aai yaad koi khush-gawar guzri bahaar [...]

wo dushman-e-jaan jaan se pyara bhi kabhi tha
ab kis se kahen koi hamara bhi kabhi tha

utra hai rag-o-pai mein to dil kat sa gaya hai
ye zahr-e-judai ki gawara bhi kabhi tha [...]

mazi ke reg-zar pe rakhna sambhal ke panw
bachchon ka is mein koi gharaunda bana na ho

yaad-e-mazi azab hai ya-rab
chhin le mujh se hafiza mera

hasrat-e-dil na-mukammal hai kitab-e-zindagi
jod de mazi ke sab auraq mustaqbil ke sath

jab yar ne rakht-e-safar bandha kab zabt ka para us din tha
har dard ne dil ko sahlaya kya haal hamara us din tha
jab khwab huin us ki aankhen jab dhund hua us ka chehra
har ashk sitara us shab tha har zakhm angara us din tha
sab yaron ke hote sote hum kis se gale mil kar rote
kab galiyan apni galiyan thin kab shahr hamara us din tha
jab tujh se zara ghafil thahre har yaad ne dil par dastak di
jab lab pe tumhaara nam na tha har dukh ne pukara us din tha
ek tum hi 'faraaz' na the tanha ab ke to bala wajib aai
ek bhid lagi thi maqtal mein har dard ka mara us din tha