udasiyon mein bhi raste nikal leta hai
ajib dil hai girun to sambhaal leta hai

ye kaisa shakhs hai kitni hi achchhi baat kaho
koi burai ka pahlu nikal leta hai

dhale to hoti hai kuchh aur ehtiyat ki umr
ki bahte bahte ye dariya uchhaal leta hai

bade-badon ki tarah-dariyan nahin chaltin
uruj teri khabar jab zawal leta hai

jab us ke jam mein ek bund tak nahin hoti
wo meri pyas ko phir bhi sambhaal leta hai