wafa ki rah mein kya mehrban mila mujh ko
jo aap mil gae sara jahan mila mujh ko

tujhi ko apna banaya tujhi se pyar kiya
sukun-e-qalb tere bin kahan mila mujh ko

kise sunata main kaifiyyat-e-darun-e-dil
na ham-sukhan na koi ham-zaban mila mujh ko

nigah-e-qalb ke khulte hi aaj mera khuda
main dhundta tha kahan aur kahan mila mujh ko

main jab lagan ke paron se udan bharne laga
nai zamin naya aasman mila mujh ko