aa gae ho to raho sath sahar hone tak
hum bhi shayad hain yahi raat basar hone tak

nama-bar sust-qadam us pe ye rah-e-dushwar
zinda rahna hai hamein un ko khabar hone tak

dam nahin lenge kisi taur ye khate hain qasam
zulm ki aahani diwar mein dar hone tak

aasmanon se ladi dil se nikal kar ek aah
ek pal chain se baithi na asar hone tak

aql khamosh tamashai ki taswir bani
ishq takraya hai maidan ke sar hone tak

khwab-e-ghaflat se na bedar hue hum jo abhi
zulm badhta hi rahega ye sahar hone tak

us ke kun kahne se takhliq hue kaun-o-makan
der kya lagti hai mitti ko bashar hone tak

laut aane ko kaha us ne to aankhen 'athar'
hum ne raste pe rakhin us ka guzar hone tak