aa hi jati hai kabhi apne sukun-e-dil ki yaad
darmiyan-e-qar-e-dariya jaise ho sahil ki yaad

dil ko kuchh ulfat si hai mazi ke subh-o-sham se
apni tanhai ki ho ya aap ki mahfil ki yaad

rukh pa zulfen hain pareshan kuchh fasurda se hain wo
aa gai hai bhul kar shayad kisi bismil ki yaad

mit gae hum jis nigah-e-naz ke ek war se
dil mein baqi ab bhi hai us ghamza-e-qatil ki yaad

aae the mahfil mein teri lakh armanon ke sath
ja rahe hain dil mein le kar ek teri mahfil ki yaad