aa rahi hai ye tur se aawaz
aae wo jis ko tab-e-did pe naz

ye tadap aur ye aah ruh-e-gudaz
hae hain apna khud nahin hamraaz

hai wahin ibtida-e-sarhad-e-naz
ho jahan khatm aql ki parwaz

wo muqarrar to dar karen apna
dhund legi meri jabin-e-niyaz

ek mizrab-e-gham mein tut gaya
kitna nazuk tha zindagi ka saz

parda-e-zist utha raha hun main
ab to uth parda-e-harim-e-naz

un ki nichi nazar ka ochha tir
dil mein hai misl-e-umr-e-khizr daraaz

waqt-e-akhir nafas mein pata hun
teri raftar-e-naz ke andaz

kaisa giryan hai kaisa nadim hai
meri mayyat pe mera duniya-saz

har zamin sair-gah thi apni
hae wo 'abr' quwwat-e-parwaz