aabla-pai hai mahrumi hai ruswai hai
us but-e-naz ka dil phir bhi tamannai hai

meri aankhon se tapakte hain lahu ke aansu
aaj be-laus mohabbat ki bhi ruswai hai

lab pe phir nam wahi husn wahi aankhon mein
ai dil-e-zar yahi teri shakebai hai

mazhaka-khez hai andaz-e-takallum un ka
mai-e-ulfat magar aankhon mein utar aai hai

'sani'-e-zar tu ab aur karegi kya kya
aastane pe musalsal to jabin-sai hai