aadmi ka hai fasana khak se
hai azal se dostana khak se

aap ke chehre pe raunaq hai bahut
kya koi nikla khazana khak se

main kisi ka bhi rahun muhtaj kyon
pa raha hun aab-o-dana khak se

ek qadam bhi kya uthe us ke baghair
chal raha hai ye zamana khak se

zahr bhar de jo tumhaare khun mein
mat ugao aisa dana khak se

jina marna hai lahad ki khak mein
mera raushan aastana khak se

'sahir' aalam aashkara ho gaya
pyar tera walihana khak se