aadmi ko zauq-e-soz-e-dard-e-insan chahiye
dard hi jis ki dawa ho aisa arman chahiye

ek nae insan ka insan hai ab tak muntazir
jo sarapa-dard-e-insan ho wo insan chahiye

ai hakim-e-na-shanas-e-zauq-e-dard-e-dard-mand
dard-mandon ke liye mujh ko hi darman chahiye

doston ka qatl aula hai ba-jae dushmanan
dushmanon par bhi to kuchh andaz-e-ehsan chahiye

bahr-e-gham-khwari-e-insan umr shahron mein kati
wusat-e-gham ko agarche tha bayaban chahiye

dusre ka aish bhi wajh-e-masarrat hai agar
muttasil apne gulistan ke gulistan chahiye

gar hunar-mandi ka dawa mushkilat-e-fan se hai
mere azm-e-shauq ko khar-e-mughilan chahiye

jis ke zauq-e-zindagi se zindagi sab ko mile
mere zauq-e-sher ko aisa ghazal-khwan chahiye

ek 'anwar' hi shahid-e-dard-e-insan hai to kya
nau-e-insan hi sharik-e-dard-e-insan chahiye